Saturday, 24 August 2013

ಆಸ್ಟ್ರೇಲಿಯಾದ ನಗದಿನ ಪುರಾಣ


ಜಗತ್ತಿನಲ್ಲೆ ಪ್ರಪ್ರಥಮವಾಗಿ ಪ್ಲಾಸ್ಟಿಕ್ ನೋಟುಗಳನ್ನು ತಯಾರಿಸಿ, ಬಳಸಿದ ಕೀರ್ತಿ ಆಷ್ಟ್ರೇಲಿಯಕ್ಕೆ ಸಲ್ಲುತ್ತದೆ. ಪ್ಲಾಸ್ಟಿಕ್ ನೋಟುಗಳು ಪಾಲಿಮರ್‌ನಿಂದ ತಯಾರಿಸ್ಲಟ್ಟಿದ್ದು  ಇವುಗಳಿಂದ ಖೋಟಾನೋಟುಗಳನ್ನು ತಯಾರಿಸುವದು ಅಷ್ಟು ಸುಲಭವಲ್ಲ.  ಅಷ್ಟೇ ಅಲ್ಲದೆ ಇವುಗಳನ್ನು ಶುಭ್ರವಾಗಿಟ್ಟುಕೊಳ್ಳಬಹುದು ಮತ್ತು ಸರಾಗವಾಗಿ ತೊಳೆಯಬಹುದು. ಈ ನೋಟುಗಳನ್ನು ಆಷ್ಟ್ರೇಲಿಯ ಪ್ರಪ್ರಥಮವಾಗಿ ೧೯೮೮ರಲ್ಲಿ ಚಲಾವಣೆಗೆ ತಂದಿತು.

ಇಲ್ಲಿನ ಮೂಲನಿವಾಸಿಗಳು ಯುರೋಪಿನ ಜನರ ಆಗಮನಕ್ಕಿಂತ ಮೊದಲು ಯಾವದೇತರಹದ ಹಣವನ್ನು ಉಪಯೋಗಿಸುತ್ತಿರಲಿಲ್ಲ ಎನಿಸುತ್ತದೆ. ಆದರೆ ಯುರೋಪಿನ ವಸಾಹತುಗಾರರು ಇಲ್ಲಿಗೆ ಮೊದಲು ಬಂದಾಗ ಸ್ವಲ್ಪ ಮಟ್ಟಿಗೆ ಬ್ರಿಟೀಷ್ ನಗದನ್ನು ಉಪಯೋಗಿಸುತ್ತಿದ್ದರೂ ಹೆಚ್ಚಾಗಿ         ತಮ್ಮ ತಮ್ಮಲಿಯ ವಸ್ತುಗಳ ವಿನಿಮಯದ ಮೂಲಕ ವ್ಯಾಪಾರಮಾಡುತ್ತಿದ್ದರು. ಅದರಲ್ಲೂ ರಮ್‌ನಂತೂ ಹೆಚ್ಚಾಗಿ ಹಣದ ರೂಪದಲ್ಲಿ ಬಳಸುತ್ತಿದ್ದರು. ಬಹುಶಃ ರಮ್‌ನ್ನು ಬಹಳ ದಿನ  ಶೇಖರಿಸಿಡಬಹುದು ಮತ್ತು ಅದರ ಬೆಲೆ ಯಾವಾಗಲೂ ಕಡಿಮೆ ಆಗುವದಿಲ್ಲ ಎನ್ನುವದೇ ಇದಕ್ಕೆ ಕಾರಣವಾಗಿರಬಹುದು.
೧೮೧೮ರಲ್ಲಿ ಬ್ಯಾಂಕ ಆಫ್ ನ್ಯುಸೌಥ ವೇಲ್ಸ್ ’ಪೋಲಿಸ್ ಫ಼ಂಡ್ ನೋಟು’ಗಳನ್ನು ಮುದ್ರಿಸಿದ ಮೇಲೆ ಜನರು ಅವುಗಳನ್ನೇ ಉಪಯೋಗಿಸ ತೊಡಗಿದರು. ಇವೇ ಆಷ್ಟ್ರೇಲಿಯಾದ ಮೊದಲ ಅಧಿಕೃತ ನೋಟುಗಳು.
೧೯೦೧ರಲ್ಲಿ ಆಷ್ಟ್ರೇಲಿಯ ಒಂದು ಸ್ವತಂತ್ರ ದೇಶವೆಂದು ಘೋಷಣೆಯಾದಾಗ ಅದು ತನ್ನದೇ ಆದಂತಹ ನಗದನ್ನು ಹೊಂದಬೇಕಾಯಿತು. ಅದರಂತೆ ೧೯೧೩ರಲ್ಲಿ ಆಷ್ಟ್ರೇಲಿಯಾ ಹಳೆಯ ಬ್ರಿಟೀಶ ಪದ್ದತಿಯಂತೆ ತನ್ನ ಪ್ರಥಮ ’ಆಷ್ಟ್ರೇಲಿಯನ್ ಪೌಂಡ್’ನೋಟುಗಳನ್ನು ಹೊರತಂದಿತು. (೧ಪೌಂಡ್=೨೦ಶೀಲಿಂಗ್,೧ಶೀಲಿಂಗ್=೧೨ಪೆನ್ಸ್).

೧೯೬೬ರ ತನಕ ಆಷ್ಟ್ರೇಲಿಯ ಈ ಬ್ರಿಟೀಶ ಪದ್ದತಿಯ ಪೌಂಡ್ ನಗದನ್ನೇ ಅನುಸರಿಸುತ್ತಿದ್ದು, ಆ ವರ್ಷದ ಫ಼ೆಬ್ರುವರಿ ೧೪ರಂದು ದಶಮಾನ ಪದ್ದತಿಗೆ ಬದಲಾಯಿಸಿಕೊಂಡು ಡಾಲರ ಎಂದು ಕರೆಯಲು ಪ್ರಾರಂಭಿಸಿತು.

೧೯೮೩ಕ್ಕಿಂತ ಮೊದಲು ಆಷ್ಟ್ರೇಲಿಯದ ಡಾಲರ್ ಬೆಲೆಯನ್ನು ಸ್ಥಿರವಾಗಿಟ್ಟು ಅಂತರಾಷ್ಟ್ರೀಯ ವ್ಯವಹಾರವನ್ನು ಮಾಡಲಾಗುತ್ತಿತ್ತು. ಆದರೆ ೧೯೮೩ರ ಡಿಸೆಂಬರ್೧೨ ರಂದು ಅಂತರಾಷ್ಟ್ರೀಯ ಮಾರುಕಟ್ಟೆಯ ಆಗುಹೋಗುಗಳಿಗೆ ತಕ್ಕಂತೆ ಬದಲಾಯಿಸುವ ವ್ಯವಸ್ಥೆಗೆ ಮಾರ್ಪಡಿಸಲಾಯಿತು.

ಆಷ್ಟ್ರೇಲಿಯದ ಈಗಿನ ನೋಟು/ನಾಣ್ಯಗಳು.

ನೋಟುಗಳು


  1.  ಡಾಲರ ೫ ನೋಟು-----ಇದರಲ್ಲಿ ಎಲಿಜಬೆಥ್ ರಾಣಿ ಮತ್ತು ಕ್ಯಾನ್ಬೆರಾದ ಸಂಸತ ಭವನ ಇವುಗಳನ್ನು ತೋರಿಸಲಾಗಿದೆ.
  2. ಡಾಲರ ೧೦ರ ನೋಟು-----ಇದರಲ್ಲಿ ಸಾಹಿತಿ/ಕವಿ ಬೆಂಜೊ ಪ್ಯಾಟೆರ್ಸನ್ ಮತ್ತು ಡೇಮ್ ಮೆರಿ ಗಿಲ್ಮೋರ್ ಅವರನ್ನು ತೋರಿಸಲಾಗಿದೆ ಮತ್ತು ಅವರ ಕೃತಿಗಳ ಕೆಲಭಾಗಗಳನ್ನು ಸಣ್ಣದಾಗಿ ಮುದ್ರಿಸಲಾಗಿದೆ.
  3.  ಡಾಲರ ೨೦ರನೋಟು-----ಇದರಲ್ಲಿ ರೆವೆರೆಂಡ ಜಾನ್ ಫಾಯ್ನ್ (ಇವರು ಜಗತ್ತಿನಲ್ಲಿ ಮೊದಲ ಬಾರಿಗೆ ಹ್ಯಾಲಿಕಾಪ್ಟರ್ ಮೂಲಕ ವೈದ್ಯಕೀಯ ತುರ್ತು ಸೇವೆ ಸಲ್ಲಿಸಬಹುದು ಎಂದು ತೋರಿಸಿಕೊಟ್ಟು ಅಂತಹ ಸಂಸ್ಥೆಯನ್ನು ಹುಟ್ಟುಹಾಕಿದರು.)ಮತ್ತು ಇನ್ನೊಂದು ನೋಟಿನಲ್ಲಿ ಮೆರಿ ರೈಬೆ ( ಇವರು ಅಪರಾದಿ ವಲಸೆಗಾರರಾಗಿ ೧೭೯೨ರಲ್ಲಿ ಆಷ್ಟ್ರೇಲಿಯಾಕೆ ಬಂದು ಮುಂದೆ ಅತಿ ದೊಡ್ಡ ಹಡಗು ಸಾಗಣಿಕಾ ಉದ್ದಿಮೆದಾರರಾದರು)ಇವರನ್ನು ತೋರಿಸಲಾಗಿದೆ.
  4. ಡಾಲರ ೫೦ರ ನೋಟು -----ಇದರಲ್ಲಿ ಮೂಲನಿವಾಸಿ ಬರಹಗಾರ ಸಂಶೋಧಕ ಡೆವಿಡ್ ಊನೈಪನ್ ಮತ್ತು  ಆಷ್ಟ್ರೇಲಿಯದ ಪ್ರಥಮ ಸಂಸತ ಸದಸ್ಯೆ ಏಡಿತ ಕೋವನ್ ಅವರನ್ನು ತೋರಿಸಲಾಗಿದೆ.
  5.  ಡಾಲರ ೧೦೦ರ ನೋಟು-----ಇದರಲ್ಲಿ ಡೆಮ್ ನೆಲ್ಲಿ ಮೆಲ್ಬಾ ಮತ್ತು ಪ್ರಸಿದ್ಧ ಸೈನಿಕ ಪಡೆ ಮುಖ್ಯಸ್ಥ ಸರ್ ಜಾನ್ ಮೋನಾಶ ಇವರನ್ನು ತೋರಿಸಲಾಗಿದೆ.

ನಾಣ್ಯಗಳು
  1. ೫ಸೆಂಟ್ ನಾಣ್ಯ-----ಇದರಲ್ಲಿ ಜಗತ್ತಿನ ಮೊಟ್ಟೆ ಇಡುವ ಎರಡು ಸಸ್ತನಿಗಳಲ್ಲಿ ಒಂದಾದ ಎಚಿಡ್ನಾ ಪ್ರಾಣಿಯ ಚಿತ್ರವನ್ನು ಟಂಕಿಸಲಾಗಿದೆ.
  2. ೧೦ ಸೆಂಟ್ ನಾಣ್ಯ-----ಇದರಲ್ಲಿ ಆಷ್ಟ್ರೇಲಿಯಾದ ಪೂರ್ವ ಕರಾವಳಿಯ ಕಾಡುಗಳಲ್ಲಿ ಕಾಣಸಿಗುವ ಗಂಡು ಲೈರ್‌ಬರ್ಡ್ ಪಕ್ಷಿಯನ್ನು ತೋರಿಸಲಾಗಿದೆ. 
  3. ೨೦ ಸೆಂಟ್ ನಾಣ್ಯ-----ಇದರಲ್ಲಿ ಇನ್ನೊಂದು ಮೊಟ್ಟೆಇಡುವ ಸಸ್ತನಿ ಪ್ಲೈಟಿಪಸ್‌ನ್ನು ಮುದ್ರಿಸಲಾಗಿದೆ.
  4. ೫೦ ಸೆಂಟ್ ನಾಣ್ಯ-----ಆಷ್ಟ್ರೇಲಿಯಾದ ರಾಷ್ಟ್ರ ಚಿನ್ಹೆಯನ್ನು ಬೇರೆ ಬೇರೆ ತರನಾಗಿ ಬೇರೆ-ಬೇರೆ ತರಹದ ೫೦ ಸೆಂಟ್ ನಾಣ್ಯಗಳಲ್ಲಿ ಮುದ್ರಿಸಲಾಗಿದೆ. ಆಷ್ಟ್ರೇಲಿಯಾದ ರಾಷ್ಟ್ರ ಚಿನ್ಹೆಯ ವಿಶೇಷತೆಯಂದರೆ ಇದರ ನಡುವೆ  ಆರು ರಾಜ್ಯಗಳ ಚಿನ್ಹೆಗಳನ್ನು ಹೊಂದಿದ ಫಲಕವಿದ್ದು ಈ ಫಲಕದ ಅಕ್ಕ-ಪಕ್ಕ ಕಾಂಗರೂ ಮತ್ತು ಎಮೂ ಪಕ್ಷಿಯನ್ನು ನಿಲ್ಲಿಸಲಾಗಿದೆ.
  5. ಡಾಲರ ೧ ನಾಣ್ಯ-----ಇದನ್ನು ೧೯೮೪ರಲ್ಲಿ ಡಾಲರ ೧ರ ನೋಟಿನ ಬದಲಾಗಿ ಚಲಾವಣೆಯಲ್ಲಿ ತರಲಾಯಿತು ಮತ್ತು ಇದರಲ್ಲಿ ಐದು ಕಾಂಗರೂಗಳನ್ನು ಟಂಕಿಸಲಾಗಿದೆ.
  6. ಡಾಲರ್ ೨ರನಾಣ್ಯ-----ಇದನ್ನು ೧೯೮೮ರಲ್ಲಿ ೨ ಡಾಲರ ನೋಟಿನ ಬದಲಾಗಿ ಚಲಾವಣೆಯಲ್ಲಿ ತರಲಾಯಿತು ಮತ್ತು ಇದರಲ್ಲಿ ಆಷ್ಟ್ರೇಲಿಯಾದ ಮೂಲನಿವಾಸಿ ಹಿರಿಯನೊಬ್ಬನ ಚಿತ್ರವನ್ನು ಮುದ್ರಿಸಲಾಗಿದೆ.

Sunday, 18 August 2013

ಆಸ್ಟೇಲಿಯಾದ ಇತಿಹಾಸ

ಆಸ್ಟೇಲಿಯಾ ಜಗತ್ತಿನಲ್ಲಿಯೇ ಅತೀ ದೊಡ್ಡದಾದಂತಹ ಒಂದು ಖಂಡದೇಶ.  ಆಸ್ಟ್ರೇಲಿಯಾ ಎಂದ ತಕ್ಷಣ ಎಲ್ಲರ ಮನಸ್ಸಿನಲ್ಲಿ ಮೂಡುವುದು ಇದು ಒಂದು ಬಿಳಿಯರ ದೇಶ ಎಂದು.  ಹಾಗೆಯೇ ಆಸ್ಟ್ರೇಲಿಯಾದ ಇತಿಹಾಸ ಎಂದ ತಕ್ಷಣ ಇಲ್ಲಿ ಬ್ರಿಟಿಷರು ತಮ್ಮ ವಸಾಹತನ್ನು ಸ್ಥಾಪಿಸಿದ ನಂತರ ಎಂದೇ ಭಾವಿಸುತ್ತಾರೆ.  ಆದರೆ ನಿಜವಾಗಿಯೂ ಆಸ್ಟ್ರೇಲಿಯಾದ ಇತಿಹಾಸದಲ್ಲಿ ಇಲ್ಲಿನ ಮೂಲನಿವಾಸಿಗಳು ಎಂದು ಕರೆಯಲ್ಪಡುವ ಒಂದು ಕಪ್ಪು ಜನಾಂಗದವರ, ಬ್ರಿಟೀಶ್ ಮತ್ತು ಇತರ ಯುರೋಪಿನ ವಲಸೆಗಾರರ ಅಷ್ಟೆ ಏಕೆ ಇತ್ತೀಚಿನ ದಶಕಗಳಲ್ಲಿ ವಲಸೆ ಬಂದ ಇತರ ಇನ್ನುಳಿದ ದೇಶಗಳ ಜನರ ಕಥೆಗಳು ಅಡಗಿವೆ.

ಆಸ್ಟೇಲಿಯಾದ ಮೂಲನಿವಾಸಿಗಳು

        ಆಸ್ಟೇಲಿಯಾದ ಮೂಲನಿವಾಸಿಗಳು ಈಗಿನ ಇಂಡೋನೇಷಿಯಾ ಎಂದು ಕರೆಯಲ್ಪಡುವ ಆಗ್ನೇಯ ಏಶಿಯಾ ಭಾಗದಿಂದ ೪೦,೦೦೦ - ೬೦,೦೦೦ ವರ್ಷಗಳ ಹಿಂದೆಯೇ ಇಲ್ಲಿಗೆ ವಲಸೆ ಬಂದರೆಂದು ಭಾವಿಸಲಾಗಿದೆ.  ಈ ಜನರು ಬ್ರಿಟಿಷರು ಬರುವುದಕ್ಕಿಂತ ಪೂರ್ವದಲ್ಲಿ ನಾಗರೀಕತೆಯ ಗಂಧಗಾಳಿಯನ್ನೇ ಅರಿತಿರಲಿಲ್ಲ. ಇವರಿಗೆ ಕೃಷಿ ಮತ್ತು ಹೈನುಗಾರಿಕೆ ಬಗ್ಗೆ ತಿಳಿದಿರಲಿಲ್ಲ. ಆದರೆ ಇವರ ಜೀವನಶೈಲಿ ತುಂಬಾ ಸರಳವಾಗಿತ್ತು ಮತ್ತು ಬೇಟೆಯಾಡಿ, ಮೀನು ಹಿಡಿದು ಆಹಾರವನ್ನು ಪಡೆದುಕೊಳ್ಳುತ್ತಿದ್ದರು. ಇಂಥ ದೊಡ್ಡ ದೇಶದ ತುಂಬ ಹರಡಿಕೊಂಡಿದ್ದರಿಂದ ವಿವಿಧ ಸಣ್ಣ ಸಣ್ಣ ಗುಂಪುಗಳಾಗಿ ವಾಸಿಸುತ್ತಿದ್ದು ತಮ್ಮ ತಮ್ಮದೇ ಆದಂತಹ ೨೫೦ ಕ್ಕೂ ಅಧಿಕ ಬೇರೆ-ಬೇರೆ ಭಾಷೆಗಳನ್ನು ಮಾತನಾಡುತ್ತಿದ್ದರು.   ಅಷ್ಟೇ ಅಲ್ಲದೆ ಇವರು ತಮ್ಮದೇ ಆದಂತಹ ಸಂಸ್ಕೃತಿ, ಸಂಪ್ರದಾಯಗಳನ್ನು ಬೆಳೆಸಿಕೊಂಡಿದ್ದರು.  ಅವರ ನಂಬುಗೆಯ ಪ್ರಕಾರ ಡ್ರೀಮ್ ಟೈಮ್ ಎನ್ನುವ ಕಾಲದಲ್ಲಿ ಅತಿಮಾನುಷ ಶಕ್ತಿ ಜನರನ್ನು, ಭೂಮಿಯನ್ನು ಹಾಗೂ ಸೂರ್ಯನನ್ನು ರೂಪಿಸಿದೆ ಎನ್ನುವುದು.  ಈ ಡ್ರೀಮ್ ಟೈಮ್ ಎನ್ನುವ ಕಾಲದಲ್ಲಿ ಇಡೀ ಜಗತ್ತಿನ ನಿರ್ಮಾಣ ಹೇಗೆ ಆಯಿತು ಎನ್ನುವ ಹಲವಾರು ತರಹದ ಜಾನಪದ ಕಥೆಗಳು ಈ ಜನರ ವಿವಿಧ ಗುಂಪುಗಳಲ್ಲಿ ನಮಗೆ ಸಿಗುತ್ತವೆ.  ಮತ್ತು ಈ ಕಥೆ ಅಥವಾ ನಂಬಿಕೆಗಳು ಆ ಗುಂಪುಗಳ ಸಂಪ್ರದಾಯ, ಕಲೆ ಮತ್ತು ಭಾಷೆಗಳನ್ನು ರೂಪಿಸಿವೆ.

ಈ ಜನರು ತಮ್ಮದೆ ಆದಂತಹ ಜಾನಪದ ನೃತ್ಯಗಳನ್ನು , ಹಾಡುಗಳನ್ನು ಹೊಂದಿದ್ದಾರೆ. ಇವರು ಬಳಸುವ ಡಿಡ್ಜೆರಿಡೊ ಎನ್ನವ ಕೊಳವೆಯಂತಹ(ನಮ್ಮ ಸನಾದಿಯನ್ನು ಹೋಲುವ) ವಾದ್ಯಕ್ಕೆ ೧೦೦೦ ವರ್ಷಗಳ ಇತಿಹಾಸವಿದೆ ಎಂದು ಅಂದಾಜಿಸಲಾಗಿದೆ.
ಈಗ ಆಸ್ಟ್ರೇಲಿಯಾದ ಗುರುತಿನ ಚಿನ್ಹೆ ಎಂದೆನಿಸಿರುವ ಬೂಮರಾಂಗ್ ಎನ್ನವ ಆಯುಧ-ಉಪಕರಣವನ್ನು ಈ ಮೂಲನಿವಾಸಿಗಳು ತಲ-ತಲಾಂತರದಿಂದ ಉಪಯೋಗಿಸುತ್ತಿದ್ದಾರೆ. ಕಟ್ಟಿಗೆಯಿಂದ ಕೆತ್ತಿ ಲಂಬಕೋನಾಕೃತಿಯಲ್ಲಿ ಮಾಡಲ್ಪಡುತ್ತಿದ್ದ ಈ ಉಪಕರಣವನ್ನು ಇವರು ಬೇಟೆಯಾಡಲು ಮತ್ತು ಮನರಂಜನೆಗಾಗಿ ಆಟವಾಡಲು ಉಪಯೋಗಿಸುತ್ತಿದ್ದರು. ಈ ಬೂಮರಾಂಗ್‌ನ್ನು ಸ್ವಸ್ಥಾನಕ್ಕೆ ಮರಳುವಂತೆ ಎಸೆಯುವದು ಒಂದು ವಿಶಿಷ್ಟ ಕಲೆಯೆಂದೆ ಅನಿಸಿಕೊಂಡಿದೆ. ಬೂಮರಾಂಗ್‌ನ್ನು ಈಗಂತೂ ವಿವಿಧ ತರನಾಗಿ ತಯಾರಿಸಲಾಗುತ್ತಿದ್ದು ಬೂಮರಾಂಗ ಎಸೆತವನ್ನು ಮತ್ತು ಅಂತರಾಷ್ಟ್ರೀಯ ಆಟವನ್ನಾಗಿ ಆಡಲಾಗುತ್ತಿದೆ.
ಈ ನೆಲಕ್ಕೆ ಯುರೋಪಿಯನ್ನರು ಬರುವತನಕ ಒಂದುತರಹದ ನಿರ್ಲಿಪ್ತ ಜೀವನ ನಡೆಸುತ್ತಿದ್ದ ಈ ಮೂಲನಿವಾಸಿಗಳು ಅವರ ಆಗಮನದ ನಂತರ ಬಹಳ ಸಮಸ್ಯೆಗಳನ್ನು ಎದುರಿಸಬೇಕಾಯಿತು. ನಾಗರಿಕತೆಯನ್ನು ಅರಿಯದ ಈ ಸಮುದಾಯಕ್ಕೆ ಒತ್ತಾಯದ ಮೇರೆಗೆ ಆಧುನಿಕ ಜೀವನಕ್ರಮವನ್ನು ಹೇರಲಾಯಿತು. ಇದರಿಂದ ತಮ್ಮದೇ ನಾಡಿನಲ್ಲಿ ಪರಕೀಯತೆಯನ್ನು ಇವರು ಅನುಭವಿಸುವದರೊಂದಿಗೆ ಇವರೆಲ್ಲರ ಆರೋಗ್ಯದ ಮೇಲೆ ಬಹಳ ದುಷ್ಪರಿಣಾಮ ಬೀರಿತು. ಈ   ಮೂಲನಿವಾಸಿಗಳನ್ನು ಆಧುನಿಕತೆಗೆ ಒಳಪಡಿಸುವ ಭರದಲ್ಲಿ ಬ್ರಿಟೀಶರು ಇವರ ಮಕ್ಕಳನ್ನು ಇವರಿಂದ ಒತ್ತಾಯಪೂರ್ವಕವಾಗಿ ಬೇರ್ಪಡಿಸಿ ಮಕ್ಕಳಿಗೆ ಆಧುನಿಕ ಶಿಕ್ಷಣವನ್ನು ಕೊಡಿಸಿದರು. ’ಸ್ಟೋ
ನ್ ಜನರೇಶನ್’ಎಂದು ಕರೆಯಲ್ಪಟ್ಟ ಈ ಮೂಲನಿವಾಸಿಗಳ ಸಂತತಿ ಅನುಭವಿಸಿದ ಯಾತನೆ ಯಾರೂ ಮರೆಯಲಾಗದಂತಹುದು.
,
ಆಸ್ಟ್ರೇಲಿಯಾಕ್ಕೆ ಯೂರೋಪಿಯನ್ನರ ಆಗಮನ:

೧೬೦೬ ರಲ್ಲಿ ಡಚ್ ಸಂಶೋಧಕನಾದ ವಿಲಿಯಮ್ ಜಾನ್ಸ್‌ಜೂನ್ ಆಸ್ಟ್ರೇಲಿಯಾದ ಈಗಿನ ಕ್ವೀನ್ಸ್‌ಲ್ಯಾಂಡ್ ರಾಜ್ಯಕ್ಕೆ ಭೇಟಿ ನೀಡಿದನು.  ಇವನೇ ಆಸ್ಟ್ರೇಲಿಯಾಕ್ಕೆ ಭೇಟಿ ನೀಡಿದ ಪ್ರಥಮ ಯೂರೋಪಿಯನ್.  ನಂತರದ ವರ್ಷದಲ್ಲಿ ಸ್ಪ್ಯಾನಿಷ ಸಂಶೋಧಕ ಲೂಯಿಸ್ ವೇಜ್ ಡೆ ಟೊರಸ್ ಎಂಬುವವನು ಆಸ್ಟ್ರೇಲಿಯ ಮತ್ತು  ಪಾಪುವಾ ನ್ಯೂಗಿನಿಯಾಗಳ ನಡುವೆ ತನ್ನ  ದೋಣಿ ಮೂಲಕ ಹಾದು ಹೋದನೆಂದು ಹೇಳಲಾಗುತ್ತದೆ. ಈ ಸಮಯದಲ್ಲಿ  ಯುರೋಪಿಯನ್ನರು ಈ ದೇಶವನ್ನು ’ನ್ಯೂಹಾಲಂಡ್’ಎಂದು ಕರೆಯುತ್ತಿದ್ದರು. ನಂತರದ ವರ್ಷಗಳಲ್ಲಿ ಬಹಳಷ್ಟು ಯೂರೋಪಿಯನ್ನರು ಭೇಟಿ ನೀಡಿದರೂ ಅವರಿಗೆ ಇಲ್ಲಿ ನೆಲೆಸಲು ಯಾವುದೇ ಆರ್ಥಿಕ ಅನುಕೂಲತೆಗಳು ಕಾಣಿಸಲಿಲ್ಲ.  ಏಕೆಂದರೆ ಇದು ಒಣಭೂಮಿ ನೆಲೆಸಲು ಯೋಗ್ಯವಾದ ಸ್ಥಳವಲ್ಲ ಎಂದು ಅವರು ಭಾವಿಸಿದರು.  ೧೬೪೨ ರಲ್ಲಿ ಡಚ್ ಈಸ್ಟ್ ಇಂಡಿಯಾ ಕಂಪನಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಏಬಲ್ ಟಾಸ್ಮನ್ ಎಂಬುವವನು ಟಾಸ್ಮೇನಿಯಾಕ್ಕೆ ಬಂದನು. (ಅವನ ಹೆಸರಿನಿಂದಲೇ ಅದು ಟಾಸ್ಮೇನಿಯಾ ಎಂದು ಕರೆಯಲ್ಪಟ್ಟಿದೆ.) ೧೬೮೮ರಲ್ಲಿ, ವಿಲಿಯಮ್ ಡೆಂಪಿಯರ್ ಎನ್ನುವವನು ಆಸ್ಟ್ರೇಲಿಯಾಕ್ಕೆ ಪಾದರ್ಪಣೆ ಮಾಡಿದ ಪ್ರಥಮ ಇಂಗ್ಲೀಷಿಗನಾಗಿದ್ದಾನೆ. ನಂತರ ಹಲವಾರು ಜನರು ಇಲ್ಲಿಗೆ ನಾವೆಗಳ ಮೂಲಕ ಬಂದು ಹೋದರು. ಆದರೆ ಬ್ರಿಟೀಶರು ಈ ಹೊಸ ಭೂಮಿಯನ್ನು ತಮ್ಮ ವಶಕ್ಕೆ ತೆಗೆದುಕೊಳ್ಳಬೇಕೆಂಬ ಉದ್ದೇಶದಿಂದ ೧೭೭೦ ರಲ್ಲಿ ಕ್ಯಾಪ್ಟನ್ ಜೇಮ್ಸ್ ಕುಕ್‌ನನ್ನು ಇಲ್ಲಿಗೆ ಕಳುಹಿಸಿದರು. ಜೇಮ್ಸ್ ಕುಕ್ ಈಗಿನ ನ್ಯೂಸೌಥ ವೇಲ್ಸ್‌ದ ಬಾಟನಿ-ಬೆ ಎಂಬಲ್ಲಿ ಬಂದಿಳಿದು ಅಲ್ಲಿಯ ಪ್ರದೇಶವನ್ನು ಅಭ್ಯಸಿಸಿ ಹಾಗೆ ಹೋಗ ಬೇಕಾದರೆ ಆಸ್ಟ್ರೆಲಿಯಾದ ಪೂರ್ವ ಕರಾವಳಿಯಗುಂಟ ಪ್ರಯಾಣಿಸಿದನು. ಆ ಸಮಯದಲ್ಲಿ ಅವನು ತಯಾರಿಸಿದ ಆಸ್ಟ್ರೇಲಿಯಾದ ನಕ್ಷೆ, ಇಂಗ್ಲೆಂಡ್‌ನಿಂದ ಬಂದು-ಹೋಗುವ ಸಮುದ್ರ ದಾರಿಯ ನಕ್ಷೆ ಬಹಳ ಸರಿಯಾಗಿದ್ದು, ವೈಜ್ಞಾನಿಕ ಉಪಕರಣಗಳು ಇಲ್ಲದಿದ್ದ ಆ ಕಾಲದಲ್ಲಿ ಅವನು ಮಾಡಿದ ಈ ಸಾಧನೆ ಅವನ ಸಮುದ್ರ ಯಾನದ ಪರಿಣತಿಗೆ ಸಾಕ್ಷಿ ಆಗಿದೆ. ಅವನು ಪೂರ್ವಕರಾವಳಿಯಲ್ಲಿಯ ಅನೇಕ ಭೂಭಾಗಗಳನ್ನು ಅವುಗಳ ಅಕ್ಷಾಂಶ-ರೇಖಾಂಶಗಳೊಂದಿಗೆ ಗುರುತಿಸಿ ಅವುಗಳಿಗೆ ತನ್ನದೇ ಆದಂತಹ ಹೆಸರುಗಳನ್ನು ಕೊಟ್ಟಿದ್ದಾನೆ. ಆ ಸ್ಥಳಗಳನ್ನು ಇನ್ನೂ ಸಹಿತ ಅವೇ ಹೆಸರಿನಿಂದ ಕರೆಯಲಾಗುತ್ತದೆ. ಹೀಗೆ ಸಂಪೂರ್ಣ ಮಾಹಿತಿಯೊಂದಿಗೆ ಮರಳಿದ ಕ್ಯಾಪ್ಟನ್ ಕುಕ್‌ನ ಶಿಫ಼ಾರಸಿನಂತೆ ಬ್ರಿಟಿಶರು ಈ ಹೊಸ ಭೂಮಿಯಲ್ಲಿ ತಮ್ಮ ವಸಾಹತನ್ನು ಸ್ಥಾಪಿಸಲು ಮುಂದಾದರು.